ردت الفنانة المصرية شيرين عبد الوهاب على زوجها السابق الفنان المصري حسام حبيب وتعليقه "انا سرقت ازاي كنت لابس طاقية الإخفا"، قائلة: "أولاً انا ما اتهمتوش بسرقة خزنة، تاني حاجة ازاي هيبقى سارق مني خزنة و هبعتله مقابل 200 ألف دولار، و ازاي بيقول ان انا سرقت تحويلها البنكي و انا اصلاً اللي بعتاله الناس يعملوله حساب في البنك لأن ما كنش عنده ذمة مالية، عملتله حساب بالجنية المصري وحساب بالدولار عشان الفلوس اللي هياخدها مني يحطهم في الحساب ده".
وتابعت:"الناس الشعبيين اللي من القلعة هما الجدعان، هما المتربيين اللي ما يقبلوش ست تصرف عليهم 6 سنين، و بشهادة كل الناس حتى رضوى الشربيني قالتها".
كما ردت شيرين على طلب حسام من الناس أن يساعدوه وينقذوه :"ما فيش راجل من ظهر راجل يقول كده للناس، الرجل بيعرف يدي ظهره و يمشي، مش يقعد يبوس الأيادي و يقول هموت من غيرك، و أظن الناس كلها شاهدة على الحلقة اللي عملها في رمضان، أنا كل مرة برجع عشان بلاقيه بيعيط و بيركع، كل مرة بيصعب عليا".
وأضافت: "أنا انتهيت، ده كان واخدني زي الشمعة المنورة، ناجحة، جميلة عندي أغاني، ده انا بقالي 6 سنين مش عارفة أنزل أغنية من غيرته، ده أنا عملتله استوديو ما عمليش فيه ولا أغنية، و الحمد لله ربنا فرجها عليا و بعد ما سبنا بعض الأغاني نازلة كمان أيام".
وعن قول حسام حبيب أن شيرين تستخدم قوتها عشان الناس بتحبها ردت : "الناس بتحبني عشان أنا حقيقية، و بطل بقى شكلك بقى وحش".
وقالت: "أنا شيرين عبد الوهاب مهري كان 25 قرش، أبقى أنا ست طماعة ولا ببص لفلوس".
كما قالت: "هو انا في المشكلة اللي فاتت في حد في الوطن العربي كله سمع صوتي ؟، بطل ظلم و بطل كذب على الناس، حرام عليك ده انت بتتكلم بإسم ربنا، انت دلوقتي بتاكل في لحمي، في لحم الست اللي كانت مراتك بس ببلاش، انت اللي قابض وانت ماشي".
جاء كلام شيرين لموقع القاهرة 24.
وكان صرح الفنان حسام حبيب رداً على طليقته الفنانة شيرين عبد الوهاب: "طبعا أنا خجلان من كل اللي بيحصل، ومش عارف أقول أية عن اللي بيحصل، بس والله العظيم أنا بريء من اللي بيحصل، ممكن يكون دا حصل عشان خاطر هي بتحاول تتصل بيا بقالها يومين تلاتة وأنا مبردش عليها، الورقة اللي شيرين بتقول بيها أنها حولت ليا مبلغ مالي، مكتوب فيها غرض التحويل لزوج، فأول حاجة كدا هو أنا زوجها !!، ثانيا حتى لو كنت الزوج وهي بتدلعني بالمبلغ دا إزاي تخرج تقول أني عايز أموتها، يا هي بتكدب لما قالت اننا اطلقنا يا هى بتكدب على البنك وقالت أني زوجها وحولتلي".
وشارك حسام صورة من هاتفه، كما قال :"شيرين عبد الوهاب دمها بقا تقيل والمرة دي بجد هحبسها، وهي خرجت النهاردة وقالت الكلام دا لأنها عمال تتصل بيا لحد إمبارح بليل عشان نرجع لبعض، وأنا مبردش عليها، عشان انا رافض نرجع تاني بعد كل اللي حصل أخر مرة لما الأمر وصل للنيابة والحوار كبر، وفي الأخر عشان أنا زهقت عملتلها بلوك".
وتابع: "الموضوع مش بالعافية أنا مش عايز أرجع، وأنا اللي في سجن وعايز أتحرر منه، أنا اللي تعبت وأستحملت إهانات بقالى سنين على حاجات محصلتش، وعمري ما أشتكيت ولا أتكلمت ولا دفعت عن نفسي عشان ميطلعش شكلها وحش، بس خلاص كدا أنا فاض بيا، وكل حاجة هتتقال للناس زي ماحصلت بظبط، أنا عمري ماطلعت أسرار حد برا ولا عمري ماكنت هعمل كدا، بس خلاص أنا أضطريت لكدا، الحياة مش بالعافية أنا مش عايز أرجعلها، وأنا اللى بستنجد بالناس وبقولهم نجمتكم الكبيرة اللى بتحبوها من سنين كتيرة، عايز أبعد عنها ومش عارف، أتصرف إزاي وأستنجد بمين، وأنا بدعي ربنا قدامكم أهو يارب عايز أبعد عنها يارب ومش عارف أعمل أية، أنا تعبت بجد وسنين من الظلم والأهانة وبسكت ومبردش، وكل الكلام اللي كانت بتقوله غلط كله، هو في حد يكون ضارب حد وفتحله دماغله، ويعتذرله عادي، وقبلها كنت حالق شعرها وتعتذرلي عادي، ويرجعله تاني، هو حاجة اسمها كدا، بتقول عشان بهددها!! بهددها بإية دا اللي هي قالته للناس أقوي من أي تهديد، اي اللي عندي أهدده به، وأقول ربنا كبير لحد ما أظبط ورقي وأكلم المحامين بتوعي عشان أعرف أخد حقي ومش هتنازل المرة دي خالص، وهاخد حقي بالقانون لأني عملت حساب للعشرة أكتر من مرة، وكل مرة بيطلع أكتر من اللى قبله، أيام مكلمة لميس الحديدي وطلعت قالت شتائم وحاجاة في حقي، كفاية كفاية ناس".
وعن سرقته خزنة شيرين عبد الوهاب، قال حسام حبيب: "أنا عايز أعرف إزاي سرقتها، هل دخلت وأنا لابس طاقية الأخفاء، ومحدش شافني، وكل مرة سرقة وكلام أقل بكتير من أني أعلق عليه، كل شوية أنا سرفت وعملت، وأنا بسنتجد بكل الناس أرحموني منها، دا ذنب أنا عملته في حياتي أنا مش عارف إية دا، ولسة هطلع أتكلم كمان بكل التفاصيل، ومش بقول كدا عشان خاطر أخوفها، لا دا حقي، عشان كل شوية يتقال كلام عني وعن أهلي، وأنا مش بشكر في نفسي الحمدلله متربي ومن عيلة كويسة جدا، ومتربي في أماكن كويسة ومتعلم في مدارس كويسة جدا، وبعرف ربنا سبحانه وتعالي".
وتابع: "وعايز أقول للناس كلها شيرين عبد الوهاب بتستقوي بيكم، ودائما بتهددني عشان لو معملتش حاجة، تقولي مش هخليكم تمشي في الشارع، فأرجوكم بالله عليكم بلاش تمشوا مع حد عايز أظلم حد".
جاء كلام حسام حبيب لـet بالعربي.
